ភ្នំពេញ៖ ភរិយានាយករដ្ឋមន្ត្រីកម្ពុជា ដែលជាស្ត្រីទី១នៃកម្ពុជា គឺលោកស្រី ពេជ ចន្ទមុនី្ន បានអញ្ជើញដឹកនាំក្រុមការងារចុះទៅត្រួតពិនិត្យអាកាសយានដ្ឋានអន្តរជាតិសៀមរាបអង្គរ នាព្រឹកថ្ងៃទី២៥ ខែតុលា ឆ្នាំ២០២៣។ នេះបើតាមការផ្សាយព័ត៌មានដោយនាយកដ្ឋានច្រកទ្វារទី១។

លោកស្រី ពេជ ចន្ទមុនី្ន បានធ្វើដំណើរទៅទស្សនកិច្ចអាកាសយានដ្ឋានអន្តរជាតិសៀមរាបអង្គរ ដោយឧទ្ធម្ភាគចក្រ។ ដំណើរទស្សនកិច្ចរបស់លោកស្រី ពេជ ចន្ទមុន្នី ដូចតាមការគ្រោងទុក ដែលលោកស្រីបានបញ្ជាក់នៅក្នុងបណ្តាញសង្គមរបស់លោកស្រី កាលពីថ្ងៃអាទិត្យទី២២ ខែតុលា ក្រោយពីមានពលរដ្ឋខ្មែរជាច្រើនកុះករបានទៅមើលព្រលានយន្តហោះសៀមរាបថ្មីដែលទើបតែដាក់ឱ្យប្រើប្រាស់កាលពីថ្ងៃទី១៦ ខែតុលា កន្លងទៅនេះ។ 

គូសបញ្ជាក់ថា អាកាសយានដ្ឋានសៀមរាបអង្គរ ជាអាកាសយានដ្ឋានលំដាប់ថ្នាក់ 4E ដែលមានផ្លូវរត់ប្រមាណ ៣ ៦០០ម៉ែត្រ ដែលអាចទទួលយន្តហោះប្រភេទ (Code E) ធ្វើប្រតិបត្តិការបាន។ «អាកាសយានដ្ឋានអន្តរជាតិថ្មី» នេះមានទីតាំងស្ថិតនៅភូមិក្រៀលពង ឃុំពពេល និងភូមិប្រវាល ឃុំតាប៉ែក ស្រុកសូទ្រនិគម ខេត្តសៀមរាប មានទំហំ ២០០ហិកតា ដែលមានចម្ងាយ ៤០គីឡូម៉ែត្រពីរមណីយដ្ឋានអង្គរ និង ៥០គីឡូម៉ែត្រពីប្រជុំជនក្រុងសៀមរាប។

អាកាសយានដ្ឋានសៀមរាបអង្គរមានចំណតយន្តហោះចំនួន ៣៨ចំណត ក្នុងនោះមានចំណត Code E ចំនួន ១១ចំណត និងចំណត Code C ចំនួន ២៧ចំណត អគារប៉មបញ្ជាហោះហើរមួយមានកម្ពស់ ៨០ម៉ែត្រ និងមានស្ថានីយ៍អ្នកដំណើរមួយដែលអាចទទួលបានភ្ញៀវចំនួន ៧លាននាក់ នៅឆ្នាំ២០២៤ និង ១២លាននាក់ក្នុងឆ្នាំ២០៤០ ខាងមុខមានសមត្ថភាពផ្ទុកទំនិញតាមផ្លូវអាកាសបានចំនួន ១០ ០០០តោន ក្នុងឆ្នាំ២០២៤ និង ២៦ ០០០តោនក្នុងឆ្នាំ២០៤០ ខាងមុខនិងអាចទទួលជើងហោះហើរបានចំនួន ៦៥ ៨០០ជើងក្នុងឆ្នាំ២០២៤ និង ១១២ ៧០០ជើង ក្នុងឆ្នាំ២០៤០។

អាកាសយានដ្ឋានអន្តរជាតិសៀមរាបអង្គរ បានវិនិយោគទឹកប្រាក់ចំនួនជាង ១ពាន់លានដុល្លារអាមេរិក ដែលជាទឹកប្រាក់របស់រដ្ឋាភិបាលចិនជាមួយរយៈពេលសាងសង់ ៣ឆ្នាំក្រោមលក្ខខណ្ឌវិនិយោគ BOT រយៈពេល ៥៥ឆ្នាំ។ ហើយ ៥០ឆ្នាំក្រោយ នឹងប្រគល់មកឱ្យរាជរដ្ឋាភិបាលកម្ពុជា។ ក្នុងនោះការចំណាយសម្រាប់សាងសង់ផ្លូវល្បឿនលឿន ៥គីឡូម៉ែត្រតភ្ជាប់ពីអាកាសយានដ្ឋានមកផ្លូវជាតិលេខ៦ ចំណាយទឹកប្រាក់ប្រមាណ ៩៥លានដុល្លារអាមេរិក៕